Hartley oor vingers getik

Dylan Hartley, kaptein van Engeland se rugbyspan, is Woensdag ná afloop van ’n onafhanklike tugverhoor in Londen vir ses weke geskors.

Nadat Hartley verlede naweek vir Sean O’Brien met ’n stywe arm in Northampton se Europese Kampioenebeker-wedstryd teen Leinster uitgeslaan het, is hy deur die Franse skeidsregter, Jérôme Garcès, met ’n rooikaart van die veld gestuur.

’n Onafhanklike tugkomitee bestaande uit die voorsitter Simon Thomas van Wallis, Rhian Williams (Wallis) en Marco Cordelli (Italië), het Hartley se saak aangehoor. Die komitee het bevind dat die rooikaart regverdig was en die haker het skuld erken.