Prysskok vir Windhoekers

Stadsbewoners sal voorts gemiddeld 14% méér vir munisipale dienste moet opdok. Terselfdertyd sal huishoudings wat meer as 40 000 liter per water maand gebruik, nou ’n strafheffing van N$112,50 per kubieke meter water betaal sodra hulle die 40 m³-kerf verbysteek. Die Windhoekse munisipaliteit het Donderdag tydens sy stadraadsvergadering bekend gemaak dat tariewe van sy dienste drasties verhoog word. Dié verhogings kan ’n lae inkomste huishouding tot N$107,56 meer per maand kos. Die tarief vir basiese waterdienste word met 10% verhoog, terwyl ’n heffing van 15% op waterverbruik geplaas word en eiendomsbelasting ook met 10% styg. Vullisverwydering en riooldienste is onderskeidelik 10% duurder, terwyl water by gemeenskaplike krane 12% meer sal kos. Elektrisiteit sal ook duurder word, maar dié verhoging sal eers binne ’n week bekend gemaak word sodra die Elektrisiteitsbeheerraad (ECB) die nuwe munisipale tarief goedgekeur het. Die beheerraad het egter verlede week 'n verhoging in grootmaat elektrisiteitspryse van 16,71% aan NamPower toegestaan – die grootste styging in vier jaar.